Sonia Rodríguez dut izena. Bilbon jaio nintzen duela 43 urte, Basaurin bizi izan naiz urte askoan eta 2001ean nire etorkizuna Arrigorriagan zegoela erabaki nuen. Herri hau egokiena zen niretzat pertsona bezala hazteko, familia izateko eta nire bizitzan garai berri bati hasiera emateko. Izan ere, Arrigorriagan bizitzeko erabakia nire bizitza osoan hartutakoen artean onenetakoa delakoan nago.
EHUn Euskal Filologian lizentziatu nintzen eta unibertsitate honetan ere hizkuntzalaritza orokorrean ikasketa aurreratuen titulua jaso nuen. Nire formakuntza euskarari erabat lotuta egon da eta nire ibilbide profesionala ere bai, hasiera batean euskararen irakaskuntzari ekin niolako eta, 2006tik gaur egun arte Bizkaiko udal bateko euskara teknikaria bainaiz.
Nire lanbidea udaletxeko zinegotzia izatearekin uztartzen dut 2015etik aurrera. Gaur egun esan daiteke nire bizitzan izan dudan ilusio handienetako bat bizitzen ari naizela. Izan ere, 2018ko urrian alkategai izendatu nindutenetik hona, nire bizitzak 180 graduko buelta bat eman du. Nire partiduaren babes osoa jasotzeak ardura handia sentiarazi dit, baina aldi berean, indarra eman dit erronka honi ilusioz aurre egiteko.
Arrigorriaga lau urte barru nolakoa izatea nahi dudan, nire bizilagunei zer eskaini ahal diedan, bizi kalitatea eta ongizatea hobetzen nola lagundu ahal dudan eta antzeko galderak dira gaur egun neure buruan leku handia hartzen dutenak eta prest nago erantzunak bilatzeko eta aplikatzeko. Honek indarra eta animo itzela ematen dit garai berri hau erronka bezala hartzeko, ideia eta proposamen asko konpartitzeko, oso kualifikatuta dagoen eta eskarmentu handikoa den lan talde batekin lan egiteko. Arrigorriagarako onena nahi dut, etorkizun oparoa eta, esan bezala, prest nago herri honen alde sakrifizioz, apaltasunez eta konpromisoz dedikatzeko, horretarako kudeaketa gardena, eraginkorra eta hurbila bermatuz.
Pertsonak, auzoak, kudeaketa eraginkorra: zeu, geure kontu
